කොළඹ, ගම්පහ, කළුතර, මහනුවර, පුත්තලම සහ යාපනය යන දිස්ත්‍රික්ක හැර අනෙකුත් දිස්ත්‍රික්ක 19 සඳහා පනවා තිබූ ඇඳිරි නීතිය අද (09) පෙරවරු 6ට ඉවත් කිරීමත් සමඟ එම ප්‍රදේශවල ජනතාව වෙළෙඳ සැල්, ඔසුසැල් හා බැංකු වෙත පැමිණෙන ආකාරය දක්නට ලැබුනා. කොරෝනා වෛරස ආසාදනය වීම වැළැක්වීම සඳහා සෞඛ්‍ය අංශ ලබා දී තිබූ උපදෙස් පිළිපදිමින් මුඛ ආවරණ පැළද සහ දුර ප්‍රමාණය පවත්වා ගනිමින් පෝලිම්වල සිටින ආකාරය බොහෝ ස්ථානවලදී අපට දැකගත හැකි වුණා. කොළඹ, ගම්පහ, කළුතර, මහනුවර, පුත්තලම සහ යාපනය යන දිස්ත්‍රික්ක හැර සෙසු දිස්ත්‍රික්ක 19 සඳහා පනවා තිබූ ඇඳිරි නීතිය අද පෙරවරු 6 ට ඉවත් කෙරුන අතර පස්වරු 4 ට එම ප්‍රදේශ සඳහා යළිත් ඇඳිරි නීතිය ක්‍රියාත්මක වනවා.

කොවිඩ් 19 වසංගත තත්ත්වය නිසා පසුගිය පෙබරවාරි මාසයේ සිට ඇතැම් විදුලි පාරිභෝගිකයින්හට තම මාසික විදුලි බිල ගෙවීමට නොහැකිව සිටියද, කිසිඳු අයුරකින් නිවාස වලට සපයා ඇති විදුලිය විසන්ධි කිරීමක් නොකරණ ලෙස විදුලිබල හා බලශක්ති, ප්‍රවාහන සේවා කළමනාකරණ අමාත්‍ය මහින්ද අමරවීර මහතා ලංකා විදුලිබල මණ්ඩලයට උපදෙස් දී තිබෙනවා. නොරොච්චෝල ගල් අගුරු තාප බලාගාරයේ සේවක මණ්ඩල විසින් අඛණ්ඩව විදුලිය සපයමින් මහජනතාවට සපයන සේවාවන් ඇගයීම සඳහා අමාත්‍යවරයා එම විදුලි බලාගාරය වෙත ගිය අවස්ථාවේදී මේ බව සඳහන් කළා. දැනට අප රටේ සමස්ත විදුලි අවශ්‍යතාවයෙන් සියයට 60 ක් සපයනු ලබන්නේ නොරොච්චෝල ගල් අගුරු බලාගාරය මගිනි. ඩීසල් විදුලි බලාගාර කිහිපයක් හා සියයට 15ක පමණ ජල විදුලිය උත්පාදනය මගින් සෙසු විදුලිබල අවශ්‍යතා සම්පුර්ණ කර ඇති අතර පුද්ගලික අංශයේ විදුලිය නිෂ්පාදනය මේ වනවිට මුළුමනින්ම අත් හිටුවා තිබෙන්නේ දෛනික විදුලි අවශ්‍යතාවය සියයට 30 කින් පහළ යාම හේතුවෙනි. එම නිසා රජය විසින් කළින් සැළසුම් කළ පරිදි හදිසි මිල දී ගැනීම් යටතේ විදුලිය මිල දී ගැනීම මේ වනවිට අවශ්‍යතාවක් පැන නොගනින නිසා එසේ හදිසි විදුලිය මිල දී ගැනීමක් කිසිසේත්ම සිදු නොවේ. එමෙන්ම මේ වනවිට විදුලි බල මණ්ඩලය පාඩු ලබන තත්ත්වයක තිබුණත් මහජනතාවට අඛණ්ඩව විදුලිය සැපයීම සඳහා කටයුතු යොදා තිබේ. පසුගිය පෙබරවාරි මාසයේ සිට තම විදුලි බිල්පත් ගෙවීමට ඇතැම් පාරිභොගිකයින්හට කොවිඩ් 19 වසංගත තත්ත්වය නිසා නොහැකි වී ඇතත් ඔවුන්ගේ විදුලිය විසන්ධි කිරීමක් කිසිසේත්ම නොකරන ලෙස අමාත්‍යවරයා නිලධාරින්ට උපදෙස් දුන් අතර විදුලි බිල්පත් ගෙවීමට ඇති සහන කාලය අප්‍රේල් මස 30 දින දක්වා දීර්ඝ කිරීමට පියවර ගෙන තිබෙනවා. මේ අතර තම වගකීම හරිහැටි දන්නා විදුලි පාරිභොගිකයින් තම මාසික විදුලි බිල මේ වන විට ගෙවන අතර, එසේ කළ නොහැකි අයට මෙම සහන කාලය ලබා දෙන නමුත් කිසිසේත්ම විදුලිය විසන්ධි කිරීමක් දක්වා පියවර නොගන්නා බවත් අමාත්‍යවරයා සඳහන් කළා. එමෙන්ම කොවිඩ් 19 වසංගත තත්ත්වය නිසා ලෝක වෙළෙඳ පොලේ ඉන්ධන මිල වෙනස්වීම් සිදු වුවද, නොරෝච්චෝල ගල් අගුරු බලාගාරය මගින් අඛණ්ඩව විදුලිය උත්පාදනය සඳහා අවශ්‍ය ගල් අගුරු තොග මෙම වසරේ නොවැම්බර් මාසය දක්වාම පවතී. එමනිසා කිසිදු කප්පාදුවකින් තොරව විදුලිය ලබා දීමේ හැකියාව මේ වනවිට ලංකා විදුලිබල මණ්ඩලය සතුව පවතිනවා. එමෙන්ම නොරොච්චොල ගල් අගුරු බලාගාරයේ තෙවන අදියර කඩිනමින් ආරම්භ කිරීම මගින් තවත් මෙගවොට් 300ක විදුලි ධාරිතාවක් ජාතික පද්ධතියට ඒකතු කිරීම රජයේ අපේක්ෂාව බව කී අමාත්‍යවරයා විදුලි ඒ්කකයක් රුපියල් 10-12ක් වැනි මිලකට මහජනතාවට ලබා දීමට එමගින් හැකියාව ලැබෙන බවත් ප්‍රකාශ කළා. කොවිඩ් 19 වසංගත තත්ත්වය මධ්‍යයයේ වුවද නොරොච්චෝල විදුලි බලාගාරය ඇතුළු විදුලි බල ස්ථානවල සේවය කරන මණ්ඩල කරන කැපවීම අගය කරන බවද අමාත්‍යවරයා මෙහිදී අවධාරණය කළා.

දිවයිනේ පළාත් කිහිපයකට සවස් කාලයේ වැසි බස්නාහිර, සබරගමුව, මධ්‍යම, ඌව, වයඹ, දකුණු හා උතුරු මැද පළාත්වල මන්නාරම, වව්නියාව සහ කිලිනොච්චිය දිස්ත්‍රික්කවලත් සවස් කාලයේ හෝ රාත්‍රී කාලයේ දී වැසි හෝ ගිඟුරුම් සහිත වැසි ඇති වන බව කාලගුණ දෙපාර්තමේන්තුව නිවේදනය කරනවා. සබරගමුව සහ මධ්‍යම පළාත්වල ඇතැම් ස්ථානවල උදෑසන කාලයේ දී මීදුම් සහිත තත්ත්වයක් බලාපොරොත්තු විය හැකි අත​ර ගිඟුරුම් සහිත වැසි සමඟ ඇති විය හැකි තාවකාලික තද සුළංවලින් හා අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නැයි කාලගුණ විද්‍යා දෙපාර්තමේන්තුව ජනතාවගෙන් ඉල්ලා සිටිනවා.

අද උදෑසන 6 න් අවසන් වූ පැය 24 තුළ ඇඳිරි නීතිය කඩ කළ පුද්ගලයින් 1724 දෙනෙකු අත්අඩංගුවට ගෙන තිබෙනවා. එම කාලය තුළ පොලීසිය භාරයට ගෙන ඇති රථවාහන සංඛ්‍යාව 496 කි. පොලීසිය සඳහන් කළේ පසුගිය 20 වැනිදා සිට අද පෙරවරු 6 දක්වා කාලය තුළ ඇඳිරි නීතිය කඩ කළ පුද්ගලයින් 19441 කු අත්අඩංගුවට ගත් බවයි. එම කාලය තුළ වාහන 5082 ක් පොලිස් භාරයට ගෙන තිබෙනවා.

ඉන්දියාවේ වාර්තාවන සම්පූර්ණ කොරෝනා ආසාදිතයින්ගේ ප්‍රමාණය 5351 දක්වා ඉහල ගොස් තිබෙනවා.මේ අතර එරටින් වාර්තාවන සමස්ත ආසාදිත මරණ ගණන දැක්වෙන්නේ 160 ක් ලෙසින්. ගෙවුණු පැය 24 ක කාලය තුල පමණක් ඉන්දියාව තුලින් කොරෝනා මරණ 24 ක් වාර්තා වී තිබෙනවා.